നാട്ടിക: എസ് എൻ ട്രസ്റ്റ് ഹയർസെക്കൻഡറി സ്കൂൾ നാട്ടികയിലെ പ്ലസ് വൺ വിദ്യാർത്ഥിയുടെ കുടുംബത്തിന് ആശ്വാസമായി എൻഎസ്എസ് യൂണിറ്റ്. വിദ്യാർത്ഥി ഹൈസ്കൂൾ വിഭാഗത്തിൽ പഠിച്ചിരുന്ന കാലത്ത് കുടുംബത്തിന്റെ സാമ്പത്തിക പ്രയാസങ്ങൾ മനസ്സിലാക്കി, വീടിന്റെ ജപ്തി ഒഴിവാക്കുന്നതിനായി എൻഎസ്എസ് യൂണിറ്റിന്റെ നേതൃത്വത്തിൽ ഇടപെടൽ നടത്തിയിരുന്നു.വിദ്യാർത്ഥിയുടെ പിതാവ് കാൻസർ ബാധിതനായി ചികിത്സയിലായിരുന്നു. ചികിത്സയുടെ ഭാഗമായി ഡയാലിസിസിനും വിധേയനായിരുന്നു. കഴിഞ്ഞ ദിവസം അദ്ദേഹം മരണപ്പെട്ടതോടെ കുടുംബം വീണ്ടും വലിയ പ്രതിസന്ധിയിലായ സാഹചര്യത്തിലാണ് എൻഎസ്എസ് വിദ്യാർത്ഥികൾ സഹായവുമായി കുടുംബത്തിലെത്തിയത്.പലചരക്ക് സാധനങ്ങൾ, അരി, പച്ചക്കറികൾ ഉൾപ്പെടെയുള്ള അവശ്യസാധനങ്ങൾ വിദ്യാർത്ഥിയുടെ കുടുംബത്തിന് എൻഎസ്എസ് വോളണ്ടിയർമാർ കൈമാറി.എൻഎസ്എസ് പ്രോഗ്രാം ഓഫീസർ ശലഭ ജ്യോതിഷിന്റെ നേതൃത്വത്തിലായിരുന്നു സഹായപ്രവർത്തനം. അസിസ്റ്റന്റ് കോർഡിനേറ്റർ **ഷൈജ ഇ.ബി.**യും വോളണ്ടിയർമാരായ ഹിബ ഫാത്തിമ, നിവ സാബു, ദേവദർശൻ, രോഷിത് തുടങ്ങിയവരും പങ്കെടുത്തു.പഠനകാലത്ത് കുടുംബത്തിന്റെ ദുരിതം മനസ്സിലാക്കി ജപ്തി ഒഴിവാക്കാൻ സഹായിച്ച എൻഎസ്എസ് യൂണിറ്റ്, പിതാവിന്റെ മരണശേഷവും കുടുംബത്തെ കൈവിടാതെ ചേർത്തുപിടിക്കുകയായിരുന്നു. വിദ്യാർത്ഥിയുടെ പഠനത്തിനും കുടുംബത്തിന്റെ തുടർജീവിതത്തിനും ആവശ്യമായ പിന്തുണ നൽകാനുള്ള പ്രതിബദ്ധതയും എൻഎസ്എസ് യൂണിറ്റ് അറിയിച്ചു.
